Giellaælládibme

Gåktu guhtik gielav nanni ja åvdet?

Vibeke Larsen Vuona Sámedikkes subtsastij idet julevsámegiela báhkogirjje nehtan almmuduvvá!  Hurra! Vijmak! Ietján giehtoj ietjá julevsáme prosjevtaj birra majt Sámedigge le ruhtadam, duola degu Nuoraj-TV, Julevsáme vahkko, giellakursa, giellabiese jná.

Bengt-Åke Kuoljok gut Sirges tjieldev jådet subtsastij sij li tjielde bieles SMSajt julevsámegiellaj tjállegoahtám diehtojuohkemij aktijvuodan. Jus Sirggán li duola degu lárkkama de Bengt-Åkes SMSa julevsámegiellaj manni tjielde ájrrasijda. Buorre!

Jan Erik lågådallamin. Gåvvå: Mattias Harr

Jan-Erik Kuoljok subtsastij gåktu sån ietjas julevsámegielajn le barggam ja gåktu le nannim skåvllåvádtsema ja låhkåma baktu. Dálla barggá giella- ja duodjeåhpadiddjen. Jan-Erik lijkku låhkåt, ja sávvá Zlatana girjev sámegiellaj. Muv kommentárra dasi le 1+1= 2 (Jan-Erik gut skåvlåjt le vádtsám ja le smidás giellaåhpadiddje dávk jårggål Zlatana girjev midjij iehtjádijda  gudi aj dav sámegiellaj sihtap låhkåt?:)

Ylva Jannok-Nutti ja Kajsa Kuoljok libá Goahteskåvlåjn barggam. Prosjevta ulmme lij æjvvalit ja sámástit. Prosjevta baktu galggin oassálasste (máná ja ållessjattuga) tjåhkanit sámegielak dåjmajda. Árbbedábálasj máhtudahka lij guovdátjin, gå vuorrasap ulmutja siegen lidjin “åhpadiddjen”. Maŋŋela aj ådåájggásasj dåjmajt ásadin.

Mån jáhkáv dát vuohke le buorre. Dát prosjækta le buorre åvddåmærkkan prosjæktaj gånnå mánájn li buorre giellaåvddågåvå.

Anne Silja