Åtsådibme

Vijmak le julevsáme giellakonferánssa! Mån lev dási mælggadav ávvudallam. Birrusin 80 ulmutja li dán konferánssaj tjåhkanam, 80! Låhko subtsas man stuorra berustibme ja dárbbo le dákkir konferánssaj!

Konferánsan li gålmmå tiemá; åtsådibme, giellaælládibme ja åhpadus ja oahppa.

Udnásj ideda li åtsådalle giehttum guovtegielakvuoda birra, sáme pedagogijka iesjvuodaj ja gielladokumentásjåvnå birra Bijhtámsáme guovlos.

Øystein Vangsnes gut guovtegielakvuoda birra lågådaláj giehtoj le ájnas álgget nav árrat gå vejulasj guokta giela oahppat. Ulmusj juo njuorakmánnán gullá sieradusájt jienaj gaskan guovte gielajn majt bæjválattjat gullá. Máná dádjadi jus gielan le árvvo jali ij. Jus giella árvov galggá oadtjot de fámillja ja sebrudahka vierttiji vuosedit man ájnas le. Mánáj giellaåvddågåvå máhtti liehket ietjá máná. Akta muv giellaåvddågåvåjs le klássaguojmme vuodoskåvlås, Lars Theodor Kintel gut álu Facebookan sámegiellaj tjállá. Sån le aj uddni konferánsan, ja suv ájádusá Vangsnesa lågådallama maŋŋel lidjin:

“Verdens fremste forskere ved CASTL, Univ. i Tromsø knuser myter ang barns tospråklighet, foreldre på Drag skole som er redde for at barna sine blir dumme når de lærer samisk, bør lytte på fagfolk og ikke sine egne fornorskede foreldre mm! første rapport fra Julevsáme giellakonferánssa / Lulesamisk språkkonferanse"

Pigga Keskitalo giehtoj skåvlå birra. Sån le dutkam sáme pedagogihkav ja barggá Sáme allaskåvlån. Skåvlå baktu galggi máná sebrudahkaj sosialiseriduvvat, ja de le ájnas at skåvllå vaddá sajev sáme mánáj kultuvrraj ja giellaj. Sáme pedagogihkka le åhpadamvuohke mij sáme sebrudahkaj hiehpá.  

Joshua Wilbour le Bijhtámsámegiella dokumenteringsprosjevtajn barggam. Sån le tjálalattjat, video ja jiednabáttij baktu  dokumenterim ednagav unna gielatjis. Bihtámsámegielagijs li gålmmålåges. Sån gulldaliddjijda vattij sválldasav næhttabælláj gånnå  nåvkå ságastallamav máhttep báddit, sihke jienav ja gåvåv.

Muodugasj prosjækta le julevsámegiella dokumentásjåvnnåj álgaduvvam. Prosjevta namma le “Mávsulasj”.

Udnásj teknologijajn viehkken juohkkahasj gielav máhttá dokumenterit. Wilbour gut le dutke ja stuorra prosjevtajn barggam, valla mån aj gut lev “dábálasj” ulmusj. Mån lev giellaberustiddje, ja tjabu dát bloggim sjaddá juokkirak “giella dokumentasjåvnnån”.


Anne Silja